قال أحمد سمير عرفة وكيل اللاعبين في حواره لـ "الدفاع العربي": من وجهة نظرى منتخب مصر سيصل لدور الاربعه ان شاء الله وأتمنى يفوز بالبطولة هتفرق كتير اوى مع الجيل دا، اختيارات أجيرى ظالمه، حلول كتير كنّا نستخدمها مثلا في الأطراف كان نفسى اشوف جناح يمين بيراميدز رجب بكار او محمد هانى الاهلى، وفي الجناح الشمال مكنتش شايف غير عبدالله جمعه الزمالك، وكنت شايف إن صالح جمعه كان هيبقى ليه دور اكيد بس اجيرى مدرب كبير وان شاء الله اختياراته تكون موفقه والبطولة لمصر ان شاء الله، وإلى باقي الحوار:-

من متابعتك لأخبار المنتخب شايف ايه الاستعدادات اللي ممكن يعملها المنتخب بعد ضمان الصعود للأدوار الاقصائية ؟

المفروض نقفل على الفرقه شويه والإعلام يعدى شويه علشان شايف كلام كتير عن المنتخب في الإعلام وده بيسبب أزمات واخرهم أزمة عمرو وردة.

‎برأيك من أداء المنتخب أنه قادر على تحقيق البطولة خاصة وان معانا عامل الارض والجمهور‎ ؟

ان شاء الله يحقق البطولة وكنت قولتلك منتخب مصر منتخب بطولات مش منتخب ضعيف، واعتقد الجمهور والدعم الإعلامي هيبقى من أهم عوامل تحقيق البطوله .

هل محمد صلاح يقدم الأداء المنتظر منه خاصة وان في بعض الجماهير شايفة انه ما يقدم نفس المستوى اللي بيقدمه مع ليفربول؟

اللعب الافريقى مختلف تماما عن اللعب في الدوريات الأوروبية مفيش اتنين يختلفو على نجاحات نجم بحجم محمد صلاح الى حقق إنجازات كتير لنفسه ولاسم مصر واعتقد ان محمد صلاح يؤدي المطلوب منه فى الملعب حسب تعليمات المدير الفنى اجيرى .

هناك أقاويل حول اهتمام ريال مدريد بضم محمود حسن تريزيجيه هل الكلام دة حقيقي؟!

اتمنى طبعا يحدث هذا لانه لاعيب كبير، ولكني اعتقد انها إشعاعات إعلاميين ولكن من وجهة نظري مستحيل خصوصا أن تريزيجيه ليس لاعبا في فريق ليه دور فى دورى الأبطال السنه دى او اللى فاتت او ينافس على الدورى التركى الحاجات دى بتفرق كتير جدا فى التعاقدات .

ماهي اخر الاخبار عن اصابة حارس المنتخب اللاعب محمود جنش حارس مرمى الزمالك ؟؟

خبر محزن جدا لمشجعي منتخب مصرعموما وللزمالكاويه خصوصا، جنش حارس كبير وعمل موسم اكتر من رائع بس دى ارادة ربنا وأتمنى ربنا يشفيه ويعود للملاعب فى أقرب وقت.

بعض الاراء الفنية بتقول ان اداء المدير الفني خافيير اجيري لا يختلف عن مستوي باتريك كوبر يا تري ايه تعليقك؟؟

لأ طبعا، كوبر لعب كام مباراه واجيرى كام مباراه ! مفيش مقارنه لسه هنحكم على الأداء لما نقابل فرق قويه فى دور ال ١٦ وال ٨ هنشوف حلول اجيرى بالاعبين اللى هو اختارهم هتبقى عامله ازاى .

بعد ازمة اللاعب عمرو وردة.. شايف انه ممكن يؤثر علي آداء المنتخب ؟؟ وهل الاختلاف علي رجوعه ما بين مؤيد ومعارض ممكن يثير بلبلة وسط جماهير ومشجعي الكرة المصرية؟؟

اعتقد لو كان هيبقى مؤثر كنّا هنشوف هذا فى آخر مباراة، بالعكس انا شايف ان لاعيبه منتخب مصر عملت جيم كبير، وحاجه ايجابيه جدا إننا نوصل ثلاث مرات على الجول ونسجل منهم مرتين، عمرو ورده اخطا فى حق نفسه ولازم يراجع نفسه علشان ميقضيش على مستقبله .

هل هناك لاعب مفاجاه بالنسبه لك في البطوله فى منتخب مصر؟؟

من وجهه نظرى تريزيجيه ومش مفاجئة، لانه لاعيب كبير دفاعيا وهجوميا كان مستر كوبر، ولكن تحسب لمستر اجيرى انه ظهره بشكل اوضح وحرره من الدفاع علشان يدى مجهود اكبر فى قوته الهجوميه واعتقد ان هيجيله عروض بعد البطوله ان شاء الله .

كلمه أخيرة !!

بشكرك جدا على اللقاء الجميل وأتمنى من جمهور مصر العاشق لكره القدم دائما ومصدر السعاده للشعب المصرى انهم يساندو الفريق ويدعموا هذا الجيل اللى وصلنا لكاس العالم، ويملك لاعبين مميزين وعلى رأسهم محمد صلاح الحاصل على البطوله والأغلى فى التاريخ دورى ابطال أوروبا ومن احسن ٣ لاعبين فى العالم وان شاء الله البطوله لمنتخب مصر .