أبدت الفنانة فريدة سيف النصر استياءها من الهجوم الذي يتعرض له الفنانون لأي فعل يقومون به، وأشارت إلى أن النقد لابد أن يكون من أجل النصح وليس من أجل الهدم.

وقالت فريدة سيف النصر خلال منشور كتبته عبر حسابها الشخصي على فيسبوك: «أنا زعلانة علينا كلنا.. المصريين أحلى وأطيب وأجدع من كده بكتير، خفة دم وكرم وذوق، إيه اللي حصل؟، ليه بنستخبي ورا شاشات وتنزل نحر رقاب بعض، الكلمة القاسية بتذبح، بقينا نكديين منعرفش نفرق بين جد وهزار، كله عايز يتخانق مع كله.. إيه ده، كل يوم يعاملوك بوش أو حسب المصلحة».

وأضافت فريدة سيف النصر: «في إيه بعض الناس ماسكين الفنانين وكأن في تار بلا أسباب، دي عجزت ودي كرمشت ودي غيرت دينها، وده دمه تقيل وده كبر في السن لكن بيغني، وده بيرقص كونغرو، وده اتكسح ودي روحي موتي كفاية.. مالكم في إيه بجد.. هما الناس دي ما أسعدتكمش أعمالهم فترات من الزمن؟، طيب بلاش أنت مابتحبيش فلان غيرك بيحبه».

وتابعت: «في إيه يا جماعة تحسوا مخطط لهدم الفنانين القوى الناعمة، اللي فاتحين بيوت 14 مليون متخيلين، كل المهن شغالة معانا تحت أيديهم كام عامل، وأسطى كل واحد فيهم عنده أهل وزوجه، وأطفال، وفي اللي جوز ولاده وعندهم بيوت مفتوحة، بتحاربوا تمن عدد البلد في أكل عيشهم، اقرأوا كده المسلسل بيكتب ناس قد إيه عِمالة في العمل».

واختتمت: «كفاية هد في الفن، الوحش انقدوه بأدب والكويس شجعوه، إنما تهزأوا فنانين كبار ليه يعني، على فكرة أنا عارفة إنها لجان مستهدفة الفن المصري، والفن عمومًا ما هو العربي بيصب هنا.. هاه قرروا إيه.. هنشتم من ورا الشاشة، ولا هنقول كلام نصح حلو يا باشا».